Лочў
Лочў зэ дунни цондини. Та да дунни чўлэ шыканди шон хуәлуни. Вәмуди мо подичи ба лочў җуачўли.
Лў
Лўсы есын. Та зэ фулинни җўдини. Дунтян лынли лў зу щин жынлэли. Кан фулинди жын ги та ги цони. Лў хан дэди лўвар. Таму лёнгә чы цодини. Лўвар тэ щинтындихын. Ваму зэ фулинни ба йигә хўзы канҗянли. Тади шыншонди момор мянмярди. Лёнгә хи дудур нянҗин, йигә чон йиба.
Мянхуа
Мянхуа кэ хуар йилю бый,
Вә җю ги вә фәлигә мый,
Вә ма фәсы мә са пый,
Вә гә лёнха зўлигә зый.
Ба вә ма хади ман кон ви,
Вә да фәди цэ сыдый.
Дын, дын, тон, тон,
Мовар тёдо гоншон.
Хўхўр ца дошон,
Мәмәзазар пошон,
Мовар бу чы дахачи,
Гувар лёнха чыли.
Лова, лова йилюлюр,
Вә ги ни ма цо дудур,
Ни йиван, вә йиван
Ба ни ма җонли вә бу гуан.
Вава, вава ни бә да,
Ни лян ятур хохор фа,
Ни лян ваму бә дачуй,
Дажын фә хуа бә де зуй.
Вава чин - нэсы жын,
Вава лан - на бон ган.
Вава чин - жын щинтын,
Вава лан - мә жын гуан.
Вава гуэ - мо фалэ,
Вава лодо - мо нёлэ.
Вава гуэ - чуан щин хэ,
Вава лодо - чуан лан хэ.
Ниму цэ цэхуар!
Йигә хуон гәда, гын вон диха за, лю йибар воншон за. (цун)
Хун гунҗи, лю йиба, сый цэҗуә вә ги та.
Йигә фуфур бу ди, бу го, готу җеди эё. (цыязы)
Ту суй, бәзы җуон, тасы йиче есынди вон. (сызы)
Тянчи чинли, та бу җян, фонни фиди та щехуан.
Тянчи щяха, вончу по, тушон дэди җянҗян мо.
Зыю вә да, зыю вә да,
Дажын, вава ба вә ня.
Лю еер, лю гангар,
Кэ хуон хуа, лю дандар,
Җян фын – гуон гангар.
Бан за куан, йи за чон,
Тади дифон гуон зэ чён,
Тянтяр-вумый туә йишон.
Йигә да хи поню,
Бу чы цо, гуон хә ю.
